+7 (701) 759 90 19
USD 377.19 EUR 408.99
RUB 5.93 CNY 54.02
Jańalyqtar

Спортшылар дәрі-дәрмек қабылдағанда өте мұқият болуы керек - бапкер

2019 жылғы 18 желтоқсан 17:44
Бөлісіңіз:
Спортшылар дәрі-дәрмек қабылдағанда өте мұқият болуы керек - бапкер

НҰР-СҰЛТАН. ҚазАқпарат – ҚР конькимен жүгіру спортынан мемлекеттік жаттықтырушы Кенжеш Сәрсекенова допингпен ұсталған спортшылардың жазасын күшейтетін заңға қатысты пікір білдірді. Оның айтуынша, байқамай шалыс басқан бір ғана қадам спортшының келешегіне қатер төндіреді, деп хабарлайды ҚазАқпарат тілшісі.

Ұқсас жаңалықтар
Допинг қолданған 7 зілтемірші екі жыл бойы жарыстарға қатыса алмайды Мерей Ақшалов спорт жолын таңдаған жастарды адал болуға шақырды Допингпен ұсталған спортшыларға жазаны күшейтетін заң күшіне енеді

«Спортшы таза болуы керек. Бүкіл дүние жүзінде спортшылардың бәрі допингтен таза болып, жарыста өзара мықтыны анықтаса – нағыз спорт деген сол. Біздің буынның спортшылары - таза өз күшімен, еңбегімен көтерілген азаматтар. Жас кезімізде ешқандай витамин берілмейтін. Ойлап қарасаңыз, спортшы допинг қолданып, жеңіске жетіп жатса, оның ақыры допинг қолданғаны анықталмай кетсе де абырой емес. Сол үшін спортшының ары таза болуы тиіс», - дейді Кенжеш Сәрсекенова ҚазАқпарат тілшісіне.

Конькимен жүгіру спортынан жаттықтырушы өз басынан өткен жағдай туралы баяндап берді.

«1993 жылы Нью-Йоркке жарысқа бардым. Ол кезде допинг мәселесі бүгінгідей өткір емес-тін. Сол жолы суық тиіп, ауырып қалдым. Үлкен супермаркеттен барып, ыстық шығаратын, мұрынға тамызатын дәрі алдым. Спортшыларды допингке тексеру барысында мамандар менің жөтеліп, өзімді жайсыз сезініп тұрғанымды көрді. «Қандай да бір дәрі қабылдадыңыз ба?» деп сұрады. Сол кезде дәрі ішкенімді айтып, дәрі-дәрмектің қораптарын көрсеттім. Қорапты көргеннен кейін мамандар тынышталды. Сөйтсем, дәрінің құрамында дау туғызатын компоненттер бар екен. Яғни, спортшыларға енді өте мұқият болу керек. Спортшылар да адам. Темірден жаралған жоқ. Десе де, ауырып қалса, бірден дәрігер мен жаттықтырушысына хабар беруі керек. Бәрін келісіп отырған абзал», - дейді ол.

Жаттықтырушының айтуынша, Допингке қарсы ұлттық орталық спортшылар мен бапкерлердің бәріне қандай дәріні ішуге болатынын, қандайын ішуге болмайтыны көрсетілген тізім жіберіп отырады.

«Дәрінің құрамына 00,1 грам мельдоний болса, оның өзі спортшының келешегі үшін қауіпті деген сөз. Облыс-облыстағы барлық бапкер сол тізім бойынша жұмыс жүргізеді. Қадағаламаса болмайды. Байқамай шалыс басқан бір ғана қадам спортшының келешегіне қатер төндіруі мүмкін», - дейді бапкер.

Айта кетсек, Кенжеш Сарсекенова 1972 жылы туған. Жасөспірім қыздар арасындағы Қазақстанның, Әлемнің екі мәрте чемпионы, 1994 жылы Лиллехаммерде (Норвегия), 1994 жылы Нагано (Жапония) қысқы Олимпия ойындарына қатысушы, қысқы Азия ойындарына (1999, Оңтүстік Корея) қатысып, 1500 м-ге сырғанаудан 8-ші, көпсайыста 9-шы орынға ие болған. Әлем кубогының кезеңдеріне, Норвегия, Голландия, Германияда өткен халықаралық турнирлерге қатысқан. Конькиде жүгіруден спорт шебері, екі дүркін қысқы Олимпиада қатысушысы, 7 дүркін ҚР чемпионы.

Еске сала кетсек, бүгін Президент Қасым-Жомарт Тоқаев «ҚР Спорт және дене шынықтыру туралы кейбір заңнамалық актілерге өзгертулер мен толықтырулар енгізу туралы» заңға қол қойған болатын. Заң допингке қарсы ережелерді бұзғандардың жауапкершілігін қатаңдатуға, Ұлттық допингке қарсы ұйымның мәртебесін күшейтуге бағытталған.

Біздің каналымызға жазылыңыз:

Басты сөздер: Спорт, Заң,
Бөлісіңіз:

Автор:

Аян Бекенұлы

Загрузка...
Пікір қалдыру
+7
Жіберу
Сондай-ақ... оқыңыз
Загрузка...
ONLAIN QYZMETKERLER
REDAKTOR
Ербол Жанат
Ербол Жанат
954-059
REDAKTOR
Жанибек Амангелди
Жанибек Амангелди
954-059
REDAKTOR
Айдар Оспаналиев
Айдар Оспаналиев
954-059

MURAǴAT