Сөз мергендері көз мергендігімен сайысты
Ұлттық спорт қауымдастығының ұйымдастыруымен өткен шараның басты мақсаты - жұртшылыққа БАҚ өкілдері арқылы ұлттық спорт түрін насихаттау.
Жарысқа Нұр-Сұлтандағы республикалық телеарна, радио және әр түрлі сайтта қызмет атқаратын тілшілер, сондай-ақ, мерзімді басылымдарда, әлеуметтік желілерде ұлттық спорт тақырыбында жиі қалам тербейтін журналистер қатысты.
Әуелі жарыс басталмас бұрын ұйымдастырушы БАҚ өкілдеріне садақ атудың қыр-сырын үйретті. Себебі, қатысушылар арасында садақты қолына бірінші рет ұстап тұрғандар да болды. 
Жарысқа қатысуға жалпы 18 журналист өтініш беріп, жеребе арқылы қатысушылар топтарға бөлініп, өзара сайысқа түсті. Нысанаға тигізу бойынша ең жоғарғы ұпай жинаған қатысушы олимипадалық жүйе бойынша келесі айналымға өтіп отырды.
Аса тартысты өткен бәсекеде «Хабар 24» арнасының тілшісі Талғат Әбдіқожаев бас жүлдені жеңіп алса, «baq.kz тілшісі Ержан Жаубай екінші орынға ие болды. Үздік үштікті «Хабар» арнасының тілшісі Сәкен Сейтхан түйіндеді
Шара соңында ұйымдастырушылар қатысушыларға дастархан жайып, наурыз көже берді.
