21:50, 05 Қараша 2019 | GMT +6
Соңғы екі жылда 10 инспектор браконьерлікпен ұсталды - вице-министр
НҰР-СҰЛТАН. ҚазАқпарат - ҚР Экология, геология және табиғи ресурстар вице-министрі Ерлан Нысанбаев қазақстандық қорықшылар арасындағы браконьерлік оқиғалары туралы айтып берді, деп хабарлайды ҚазАқпарат тілшісі.
«Мұндай фактілер кездеседі. Мәселен, өткен жыл мен биылғы 9 айда 10 оқиға тіркелген. Олардың барлығы бойынша сот отырысы өтіп, үкім шықты. Соңғы факті бойынша қызметтік шаралар жүріп жатыр. Сот шешімін күтіп отырмыз», - деді Ерлан Нысанбаев Орталық коммуникациялар қызметінде өткен баспасөз мәслихатында.
Сонымен бірге, вице-министр Қазақстанда табиғатты қорғау инспекторларына біліктілік талаптары күшейетінін жеткізді.
«Барлық жерде жағымсыз жайттар болып тұрады. Сондықтан, инспектор лауазымына жұмысқа қабылдайтын кезде біліктілік талаптарын күшейтеміз», - деді Ерлан Нысанбаев.