СҚО Мамлют ауданына жаңа әкім тағайындалды
Руслан Әкiмжанұлы Аңбаев 1978 жылы Солтүстiк Қазақстан облысының Тимирязев ауданындағы Целинный ауылында туған. М.Қозыбаев атындағы Солтүстiк Қазақстан мемлекеттiк университетiнде экономист-менеджер, құқықтану бакалавры мамандықтары бойынша бiлiм алды.
Еңбек жолын 1999 жылы Тимирязев ауданы бойынша салық комитетiнде аудит бөлiмiнiң аға салық инспекторы болып бастады. 2002-2008 жылдары бас салық инспекторы, жанама салық аудитi, ұйымдастырушылық-құқықтық жұмыс пен салық өндiрiп алу бөлiмдерінің жетекшісі, аудандық салық басқармасы төрағасының орынбасары қызметтерiн атқарған. 2008-2015 жылдар аралығында Есiл, Тайынша аудандарының салық басқармасына басшылық еткен. Осы тағайындауға дейiн СҚО әкiмi аппарат басшысының орынбасары қызметін атқарды.
Мамлют ауданының бұрынғы әкімі Жастілек Сыздықов былтыр 1 қыркүйек күні кәсіпкерден 185 мың рубль пара алып жатқан жерінде ұсталған болатын. Жақында сот оған 22 млн теңге айыппұл төлеу жөнінде үкім шығарды.