СҚО-да жылқыны соғып кеткен көліктің жүргізушісі жарақат алды
СҚО полиция департаменті баспасөз қызметінің мәліметінше, оқыс оқиға Ғ.Мүсірепов ауданында кешке қарай болған. Алматы-Екатеринбург тас жолымен келе жатқан «Ваз-21099» жүргізушісі Рузаевка елдімекеніне 5 шақырым қалғанда қараңғыда жолдағы жылқыны байқамай соққан. 55 жастағы жастағы жүргізуші жарақат алып, ол аудандық ауруханаға жатқызылды. Жылқы сол жерде өліп кеткен, көлікке айтарлықтай зақым келді.
Полицейлердің айтуынша, жылқышы жылқыларды жолдың үстінен айдап алып өтпек болған. Оған қатысты әкімшілік хаттама толтырылып, айыппұл салынды.
Ауыл шаруашылығы жануарларын бағу туралы ережеге сәйкес төрт түлікті ортақ пайдаланатын жерде, теміржол және автомобиль жолдарына бөлінген алапта, су қорғау белдеуінде, санитарлық қорғау аймақтарында бағуға болмайды.
Ережеде сондай-ақ ауыл шаруашылығы жануарларын теміржолдан, жолдың арнайы белгіленбеген жерлерінен, дұрыс көрінбейтін жағдайда және қараңғы уақытта айдап өтуге тыйым салынғандығы көрсетілген.