СҚО-да жарты жыл ішінде тұрғындарға 275 млн теңгенің айыппұлы салынған
СҚО Полиция департаменті баспасөз қызметінің хабарлауынша, өңірдің әкімшілік полицейлері екі күндік «Борышкер» жедел-профилактикалық іс-шарасын өткізіп жатыр. Мақсат - төленбеген әкімшілік айыппұлдары бар адамдарды анықтау.
Осы жылдың 6 айында СҚО-да 274 млн 964 мың теңге болатын 74 мыңнан астам құқық бұзушылық анықталған. Алайда оның 70% ғана өндіріліп алынған. Полицейлер айыппұлды төлеуден жалтарып жүргендерді анықтау бойынша жедел-профилактикалық іс-шараларды жүйелі түрде өткізеді.
Инспекторлар «Жол приставы» мобильді бағдарламалық-аппараттық кешенінің көмегімен автокөлік ағынына мониторинг жүргізеді. Көлік камераның көру аймағына түскен кезде, компьютер көлік иесінде төленбеген берешегінің бар-жоғын анықтайды. Инспектор машинаны тоқтатып, көлік иесін деректер базасы бойынша тексереді.
Полицейлердің айтуынша, рейдтерді өткізудегі тағы бір мақсат - жүргізушілерді ақпараттандыру. Айыппұлды төлеуді созып жүрген жүргізушілерге тәртіп сақшылары заманауи төлем жасаудың тәртібін түсіндіреді. Ал борышкерлердің қарыздан құтылмайынша елден шыға алмайтындықтары ескертіледі.
«Борышкер» іс-шарасының бірінші күні полицейлер 515 түбіртек бойынша 5 млн теңгені өндіріп алды. Қазіргі таңда Еgov электронды үкімет арқылы online тәртібінде және 12 банктің филалдарында айыппұлды төлеуге болады. Сондай-ақ ірі сауда орталықтарындағы терминалдарда ЖСН-ді енгізу арқылы әкімшілік айыппұлдың бар-жоғын тексере аласыз», - дейді СҚО ПД Әкімшілік полиция басқармасының бастығы Жасұлан Оспанов.
«Жол приставы» автокешенінен басқа борышкерлерді ақпараттандыру мақсатында полицейлер берешегінің бары туралы SMS хабарламасын жібереді. Айтуларынша жыл басынан осындай 6 мың хабарлама таратылған. Жалпы, соңғы жарты жылда Әкімшілік полиция басқармасы «Борышкер» іс-шарасын 10 рет өткізіпті.
