СҚО-да вакцинация паспортын қолдан жасаған медқызметкер сотталды

ПЕТРОПАВЛ. ҚазАқпарат – Солтүстік Қазақстан облысында вакцинация паспортын қолдан жасап келген медициналық қызметкерге сот үкімі шығарылды, деп хабарлайды ҚазАқпарат тілшісі.

СҚО соты баспасөз қызметінің мәліметінше, Айыртау аудандық соты осы ауданның орталық ауруханасының фельдшеріне қатысты қылмыстық істі қарады. Медициналық қызметкер 14-21 тамыз аралығында жұмыс орнында отырып, «Профилактикалық екпе есеп журналына» жалған мәліметтерді енгізген. Соның негізінде «Вакцинация модулі» автоматтандырылған жүйесінде жалған вакцинация паспорттары қалыптастырылған.

Сотталушының кінәсі толық дәлелденді.

«Ресми құжатты қолдан жасағандарға айыппұл, түзеу жұмыстары, қоғамдық жұмыстар, бостандықты шектеу немесе 2 жылға дейін бас бостандығынан айыру жазасы қарастырылған. Алайда, сот үкім шығармас бұрын жазаны жеңілдететін және ауырлататын жағдайларды есепке алады. Ол жүктілік, асырауында жас балалардың болуы және шын жүректен өкіну болуы мүмкін», - делінген хабарламада.

Айыртау аудандық соты жазаны ауырлататын жағдайлардың болмауын есепке алып, медициналық қызметкерге бір жылға бостандығын шектеу жазасын кесті.