СҚО-да тұрақтандыру қоры арқылы 1,2 млн теңгенің дәрі-дәрмегі сатылды
СҚО денсаулық сақтау басқармасының мәліметінше, өңір басшысының тапсырмасымен өңірде дәрі-дәрмек, медициналық бұйымдар бойынша тұрақтандыру қоры құрылған.
Мақсаты – коронавирус инфекциясына, маусымдық аурулар – тұмау, суық тиюге қарсы медициналық препараттардың қорын құрып, бағаның шарықтап кетпеуіне ықпал ету.
Денсаулық сақтау басқармасы тізімге 28 дәрі-дәрмекті енгізді. Олардың ішінде вирусқа қарсы, антибактериалды, антигистаминді препараттар, антикоагулянттар, бронхолитиктер мен ыстықты түсіретін дәрілер бар. Мұның бәрі «Солтүстік» ӘКК арқылы сатып алынады, осы мақсатқа 357 млн теңге бөлінген.
Дәрі-дәрмек дәріханаларда, елдімекендерде дәрігерлік амбулаторияларда, дәрігерлік акушерлік пункттерде, медициналық пункттерде сатылады. Тұрақтандыру қорының дәрі-дәрмегі нарықтағы бағадан 15-20 %-ке арзан.
Мамандардың айтуынша, бір айдың ішінде 123 млн теңгеге тізімге енген 21 түрлі медициналық препарат сатып алынды. Бағасы арзан болғандықтан сұраныс жоғары. Шамамен үш аптаның ішінде 1,2 млн теңгенің дәрі-дермегі сатылған.