СҚО-да соғыс ардагерлеріне 250 мың теңгеден берілді

ПЕТРОПАВЛ. ҚазАқпарат - Солтүстік Қазақстан облысында Жеңіс күні қарсаңында соғыс ардагерлеріне 100 АЕК, яғни 250 мың теңге көлемінде сыйақы берілді, деп хабарлайды ҚазАқпарат тілшісі.

Былтыр өңірде 130 соғыс ардагері болса, биыл Жеңіс мерекесін олардың 82-сі ғана қарсы алмақ. Майдангерлердің ең жасы қазір 93-те. Бұдан басқа Петропавлда 3457 тыл еңбеккері тұрып жатыр.

Облыстық ардагерлер кеңесінің төрағасы Ескендір Елеусізовтің айтуынша, майдангерлердің ешқайсы назардан тыс қалмайды. Олар бұрын өздері еңбек еткен ұйым-мекемелерге бекітілген. Мейрам қарсаңында әрбіріне сый-сияпат көрсетіледі.

«Соғыс ардагерлеріне теңелгендерге биыл 5 АЕК мөлшерінде бірреттік сыйақы беріледі. Бұдан басқа, ай сайын оларға 16 АЕК - 40 мың теңге шамасында төленеді. Барлығына тісіне протез салу, санаториялық шипажайда ем алу - тегін. Сондай-ақ мереке қарсаңында ардагерлер ТМД елдері бойынша бір бағытқа тегін жол жүре алады», - деді ол.

Айта кетейік, Екінші дүниежүзілік соғысқа 92 мың солтүстікқазақстандық аттанса, әр үшінші отбасыға «қара қағаз» келді. 34 мың адам еңбек әскеріне алынды. Солтүстікқазақстандық 56 жауынгер Кеңес Одағының Батыры, 11-і Даңқ орденінің толық кавалері атанды.