СҚО-да өрттің алдын алу мақсатында 53 жедел мобильді топ құрылды

ПЕТРОПАВЛ. ҚазАқпарат – Солтүстік Қазақстан облысында өрт қауіпті кезеңнің басталуымен 53 жедел мобильді топ құрылған. Нәтижесінде қауіпсіздік талабын бұзған 151 адам анықталып, оның тоғызына айыппұл салынды, деп хабарлайды ҚазАқпарат тілшісі.

Өңірлік коммуникациялар қызметінде «Өрттің қауіпті мезгілінде өрт қауіпсіздігі ережелерін сақтау» баспасөз конференциясы өтті.

СҚО Төтенше жағдайлар департаменті бастығының орынбасары Дмитрий Растихиннің айтуынша, облыс аумағында биыл 251 өрт болып, 14 адам қаза тапты, 10-ы жараланды. 27 адамға иіс тисе, 9 адам түтінге тұншығып мерт болған.

«Орман, дала өрті толастамай тұр. Бүгінгі күні 57 га орманды алқапта 14 өрт тіркелді. Оның барлығында құрғақ шөп жанып, кейін орманға ауысқан. Жолдар мен ормандардың маңында минералды жолақтардың болмауы да себеп болған.

Ал өрт қауіпті кезең басталғалы қоқыс пен құрғақ шөпті жағудан 22 өрт тіркелді. Жалпы осы аралықта 400 рет өрт шығып, жалпы аумағы 430 га жер жанды», - дейді Дмитрий Растихин.

Өрттің алдын алу мақсатында өрт сөндірушілер полиция, жергілікті атқарушы органдармен және орман мекемелерімен бірлесе жұмыс істеп жатыр. Құрамына 314 адам кіретін 53 жедел мобильді топ құрылды. Мамандар рейдтер барысында 151 заң бұзушыны анықтап, олардың 142-сіне ескерту түріндегі әкімшілік жаза қолданды. Тоғызына 190 мың теңгенің айыппұлын салды.