СҚО-да мұқтаж отбасы балаларының жазғы лагерьде демалуына 71 млн теңге бөлінді
СҚО білім басқармасының басшысы Нәзір Жәшібеков өңірлік коммуникациялар қызметінде өткен брифингте биыл оқушылардың 93 %-ы жазғы демалыспен қамтылатынын жеткізді. Бұл – 1-10 сыныптың 69 мың оқушысы.
«1-4 сынып оқушылары үшін 456 мектеп жанында алаңдар жұмыс істейді. 45 мың баланы қымтимыз. 1-9 сынып оқушылары – 6 771 бала үшін 11 сауықтыру лагері жұмыс істемек. Бюджет есебінен мұқтаж отбасылардың 10 816 баласына 100 % сауықтыру демалысы ұйымдастырылады, жергілікті бюджеттен 71 млн теңге бөлінді. Ал қала сыртындағы лагерьлер мен мектеп жанындағы алаңдарда 51 771 бала демалады», - дейді Нәзір Жәшібеков.
Бұдан шатырлы лагерьлер, «Жас сарбаз», пікірсайыс клубтары, «Жасыл ел» бригадалары, жазғы тіл мектептері, оқу клубтары жұмыс істемек.
Өлкетану экспедициялары және өңірдің киелі жерлеріне және бір күндік экологиялық-туристік жорықтар ұйымдастыру жоспарланған.
Мектеп жанындағы алаңдардың жұмысы 1 маусымнан, сауықтыру лагерлерінің жұмысы 15 маусымнан басталмақ.
Оқушылар сарайында мың баланы қамтитын Жазғы академия ұйымдастырылады.
Бұған дейін СҚО-да мектеп бітіру кешін кафеде өткізуге, ұстаздарға сыйлық беруге тыйым салынғанын айтқан едік.