СҚО-да ҚХА-ның XXVII сессиясының қорытындысы талқыланды
Сәуірдің 29-ы Нұр-Сұлтан қаласында «Бейбітшілік пен келісім формуласы: әлеуметтік бірлік және жаңғырту» тақырыбында ҚХА XXVII сессиясы өтті. Делегация құрамына этномәдени бірлестіктердің жетекшілері, Аналар кеңесінің және ғылыми-сарапшылық топтардың өкілдері кірді. Жалпы өңірден 37 делегат барды.
Дөңгелек үстелге келгендер осы сессиядан алған әсерлерімен, білген-түйгендерімен бөлісті. Сондай-ақ этносаралық бірлік, бейбітшілік пен келісім жайлы сөз өрбітті.
«Үш мемлекеттен Түркия, Ресей және Германиядан шетелдіктер баяндама жасады. Осы баяндамалар бойынша мен өзім ғалым ретінде ойға түйгенім - қазіргі уақытта халықаралық аренада Қазақстан халқы Ассамблеясының тәжірибесін жоғары деңгейде зерттеп жатыр. Біздің Қазақстан 20-сыншы ғасырдан бастап көпұлтты біріктірген мемлекет ретінде дамып жатырмыз», - дейді СҚО ҚХА медиация кабинетінің меңгерушісі Гүлбақша Мұсабаева.
Сессияда болған солтүстікқазақстандық жастар Елбасы сөзінен қанаттанып қайтқандарын жасырмайды.
«Әлемде, күнделікті өмірде бәрі өзгеріп жатыр. Бір ғана дүние өзгеріссіз қалады, ол - қоғамның бірлігі мен ұлтаралық келісім», -деді Тұңғыш Президентіміз. Біз, әрине, мұнымен толық келісеміз. Тәуелсіздік жылдары дүниеге келген жаңа, жас ұрпақ жетілді. Біз - мемлекетіміздің дамуы үшін аянбай еңбек ететініміз анық. Облыс жастары елімізді, облысымызды дамытуға бағытталған барша реформаларды қолдайды», - дейді «Жаңғыру жолы» Жастар қозғалысының жетекшісі Роксана Орынбасарова.