СҚО-да ит-мысық есепке алынып, чип салынып жатыр
СҚО Ветеринария басқармасының мәліметінше, биыл елімізде «Жануарларға жауапкершілікпен қарау туралы» Заң күшіне енді. Онда жануарларды асырау қағидалары және оларға адамгершілікпен қарау талаптары реттелген. Мәселен, иелерінің үй жануарларының өмірі мен денсаулығына жауапкершілігі және оларды қатыгездіктен қорғау көзделген. Сонымен қатар заң иттердің бос жүруіне тыйым салады. Ал 2023 жылдың 1 қыркүйегінен үй жануарларын тіркеу міндеттелмек.
Осыған байланысты Петропавлда үй жануарларын есепке алуға байланысты жұмыстар басталып кетті. Осы уақытқа дейін 30-ға жуық ит-мысық тіркелді.
«Есепке алынатын үй жануарларының тізіміне: ит, мысық, шиншилла, теңіз шошқасы, сәндік егеуқұйрық, тасбақа, ергежейлі шошқа кірді. Ит-мысықты тіркеу міндеттелсе, қалғанын иесі ерікті түрде құжаттай алады.
Үй жануарларын қайда есепке қоюға болады? Оны ветеринария клиникалары, панажайлар, жануарларды аулау қызметтері, питомниктер және оңалту орталықтары жүзеге асыра алады. Бүгінде СҚО-да «TANBA» жануарларды есепке алудың ақпараттық жүйесі жұмыс істейді, онда жеке кабинет ашып, үй жануарларын тіркеуге мүмкіндік бар», - дейді СҚО ветеринария басқармасының бөлім басшысы Наталья Тараканова.
Жалпы, тіркеу екі кезеңмен жүзеге асырылады. Алғашқысында жануар және оның иесі туралы мәлімет ақпараттық базаға енгізіледі. Ол жерде жануарға берілген ЖСН, тұрғылықты жері және байланыс нөмірі көрсетіледі. Екінші кезеңде жануар тексеріліп, оған чип енгізіледі.
«Чип – бұл электронды төлқұжат. Осы уақытқа дейін 15 жануарға чип салдық. Бұл ауыртпайды, кейін де асқыну болмайды. Яғни ит-мысыққа еш зиян келмейді», - дейді ветеринар дәрігер Наталья Кине.
Қазір Петропавлда чип салумен айналысатын 7 ветеринария орталығы бар. Бұл қызмет ақылы, алайда тұрмысы төмен отбасылар үшін ол тегін жүргізілмек.