СҚО-да былтыр өндірісте жарақат алғандарға 19 млн-нан астам теңге төленді
СҚО Статистика департаменті баспасөз қызметінің хабарлауынша, 2018 жылы өңірдегі кәсіпорындар мен ұйымдарда 74 адам жарақаттан зардап шегіп, еңбек қабілеттілігінен уақытша айырылса, соның 21-і әйел. Жұмыс уақытында зақым алғандардың 62,2% жекеменшік кәсіпорындар мен ұйымдарда, 32,4% - мемлекеттік және 5,4% - өзге мемлекеттердің меншігіндегі кәсіпорындарда еңбек еткен.
Мамандардың ресми мәліметінше, былтыр өндірісте 3 адам қаза тапқан. Бұл 2017 жылмен салыстырғанда 62,5% аз. Қаза тапқандардың екеуі жекеменшік, ал біреуі өзге мемлекеттердің меншігіндегі кәсіпорындарда еңбек еткен.
Қайғылы оқиға көбіне ауыл, орман және балық шаруашылығында тіркелген. Зардап шеккендердің 25,7%, яғни 19 адам осы сала қызметкерлері. Сондай-ақ денсаулық сақтау саласының 9 қызметкері, өңдеу өнеркәсібінде жұмыс істейтін 7 адам, сауда және көлік саласының 6 маманы, сумен жабдықтау және мемлекеттік басқару саласының 5 қызметкері өндірістік зақым алған.
Жазатайым оқиғалар негізінен жапа шеккендердің абайсыздығынан болады екен. Осы себеппен 28 адам уақытша еңбек қабілеттілігінен айырылған. Былтыр 13 адам биіктен құлап кетсе, 8 адам ұйымның көлігінде келе жатып жол апатына ұшыраған. Жалпы, өндірісте жарақат алушылардың әрбір төртіншісі дерлік - өндірістік жабдық операторы, құрастырушы немесе жүргізуші болып еңбек етеді.
Зардап шеккендердің жалпы санынан 44,6% 46-60 жастағылар болып тіркелген.
Статистика қызметінің мәліметтерінше, 2018 жылы өндірістегі жазатайым оқиғалар бойынша 19,2 млн теңге материалдық төлем жасалса, оның 12 млн теңгесі еңбекке жарамсыздық парағы бойынша төленген. Бұдан басқа шамамен 7 млн теңгені біржолғы жәрдемақылар құрады.