СҚО-да балық аулау тәртібін бұзғандарға 1,3 млн теңге айыппұл салынды
2022 жылғы 3 шілде 16:56

СҚО-да балық аулау тәртібін бұзғандарға 1,3 млн теңге айыппұл салынды

ПЕТРОПАВЛ. ҚазАқпарат – Солтүстік Қазақстан облысында жыл басталғалы балық аулау тәртібін бұзғандарға 70 әкімшілік хаттама толтырылды, деп хабарлайды ҚазАқпарат тілшісі.

Балық шаруашылығы комитетінің Есіл облысаралық бассейндік балық шаруашылығы инспекциясының мәліметінше, былтыр өңірде заңсыз балық аулауға қатысты 149 әкімшілік хаттама толтырылған.

«Заң бұзушылықтардың 146-сы – ҚР ӘҚБтК-нің 383-бабының 1-бөлігі «қылмыстық жазаланатын іс-әрекет белгілері жоқ балық аулау қағидаларын, сондай-ақ балық ресурстары мен басқа да су жануарларын пайдаланудың басқа да түрлерін жүзеге асыру қағидаларын бұзу» бойынша, үшеуі - ҚР ӘҚБтК-нің 383-бабының 3-бөлігі «тыйым салынған мерзімде, тыйым салынған құралдармен немесе тәсілдермен, тыйым салынған орындарда балық аулау қағидаларын өрескел бұзуға» қатысты. Жеке тұлғалар үшін 5 АЕК-тен 10 АЕК мөлшерінде айыппұл қарастырылған, заңды өрескел бұзған жағдайда оның мөлшері 20 АЕК-ке дейін ұлғаяды», - дейді облыстық балық инспекциясының мемлекеттік инспекторы Андрей Лопацкий.

Осылайша былтыр балық аулау тәртбін бұзғандарға 2 млн 406 мың теңгенің айыппұлы салынған, оның 2 млн 231 мың теңгесі өндіріліп алынды. Браконьерлерден 1 қайық және рұқсат етілмеген түрлі 8 ау тәркіленді. Бұдан басқа көлдерден иесіз 60 балық аулау құрал-жабдығы алынған.

«Биыл айыппұл мөлшері 15 мың мен 61 мың теңге аралығында. Алайда заңсыз балық аулаушыларға бұл тоқтау салмай отыр. Жыл басталғалы бері балық аулау тәртібін бұзғандарға, заңсыз сату, тасымалдаумен айналысқандарға 70 әкімшілік хаттама толтырылды. Айыппұлдың жалпы сомасы – 1 млн 329 мың теңге. Оның 1 млн 114 мың теңгесі өндіріліп алынды. Бұдан басқа 11 ау тәркіленді, иесі анықталмаған 77 балық аулау құралы алынды», - дейді Андрей Лопацкий.


Сурет:Lum3n/ Pexels
Ұқсас жаңалықтар
СҚО-да жыл басынан бері 119 адам энтеробиозбен ауырған
2022 жылғы 10 тамыз 07:57

СҚО-да жыл басынан бері 119 адам энтеробиозбен ауырған

ПЕТРОПАВЛ. ҚазАқпарат – Солтүстік Қазақстан облысында жыл басынан бері 119 адамға энтеробиоз диагнозы қойылды, олардың 90 пайыздан астамы – 14 жасқа дейінгі балалар, деп хабарлайды ҚазАқпарат тілшісі.

СҚО санитариялық-эпидемиологиялық бақылау департаменті баспасөз қызметінің мәліметінше, энтеробиозды лас қол ауруы деп те атайды. Кең таралған паразиттік аурулардың бірі. Энтеробиоздың қоздырғыштары - адамның ішектерінде пайда болған 3-12 мм ақ гельминт-құрттар.

«СҚО-да биылғы 7 айда энтеробиоздың 119 жағдайы тіркелді, оның 93,2 %–ы - 14 жасқа дейінгі балалар. Былтыр 85 адамға осы диагноз қойылды.

Энтеробиоз балалардағы бірқатар соматикалық аурулардың жиі пайда болуына және созылмалы патологияның өршуіне ықпал етеді. Паразиттік ауру балалар мен ересектерден тарайды. Құрт жұмыртқалары дезинфекциялық заттарға өте төзімді. Төсек-орындарда, ойыншықтарда, кілемдерде, ванна бөлмелері мен дәретханаларда 25 күнге дейін өміршең болуы мүмкін. Инфекция жұқтырғаннан кейін оның белгілері 12-14 күн ішінде пайда болады», - дейді облыстық санитариялық-эпидемиологиялық бақылау департаментінің инфекциялық және паразиттік ауруларды эпидемиологиялық бақылау бөлімінің басшысы Салтанат Бекқожина.

Маманның айтуынша, энтеробиозбен ауыратын баланың анус аймағы қышып, түнде ұйқысы бұзылады. Перианальды аймақты қарау кезінде терінің қызаруы, жергілікті тітіркенуі және тырналуы, кейде – экзема және суланғыш дерматит болуы мүмкін.

«Құрт жұмыртқалары тырнақтың астына түсіп, балалар саусақтарын сору, тырнақтарын тістеу, аузына ойыншықтар салу кезінде ауыз арқылы ішке түседі. Ең басты себебі - гигиена ережелерін елемеу, балалар мекемелері мен үйде санитарлық нормаларды сақтамау.

Энтеробиозбен ауырған балалардың тәбеті төмендеп, іші қатуы немесе керісінше іші өтуі мүмкін. Іші кеуіп, жүрегі айниды, құсады. Арып, баланың өсуі мен дамуына кері әсер етеді», - дейді Салтанат Бекқожина.

Энтеробиозды емдеу және гигиеналық шараларды сақтау балаларды құрт ауруынан құтқарады. Алайда, инфекция үйде толық жойылмаған жағдайда қайта ауыру қаупі бар.

«Энтеробиоз лас қол ауруы болып саналатындықтан, балаларға ерте жастан бастап гигиена дағдыларын үйрету қажет. Баланың тырнақтарын қысқа кесіп, дәретханадан кейін, тамақтанар алдында, серуендеуден кейін қолды сабындап жууды дағдыландыру. Таңертең және кешке баланы жуындырып, іш киімдерін күнделікті ауыстырып тұру, саусақтарын соруға және тырнақтарын тістеуге тыйым салу, төсек-орындарды жиі ауыстырып, көкөністер мен жемістерді қолданар алдында мұқият жуу қажет», - дейді санитар дәрігер.


Шарм-эль-Шейхтен келген жолаушыдан 200-ден астам діни мазмұндағы кітап тәркіленді
2022 жылғы 9 тамыз 19:25

Шарм-эль-Шейхтен келген жолаушыдан 200-ден астам діни мазмұндағы кітап тәркіленді

НҰР-СҰЛТАН. ҚазАқпарат – Шымкент әуежайында Шарм-эль-Шейхтен ұшып келген рейс жолаушыларын тексеру кезінде 31 жастағы жігіттен 222 діни мазмұндағы кітап тәркіленді, деп хабарлайды ҚазАқпарат Көліктегі полиция департаментінің баспасөз қызметіне сілтеме жасап.

«5 шілде күні Шымкент қаласының әуежайында халықаралық «Шарм-эль-Шейх-Шымкент» рейсімен келген жолаушыларды тексеру кезінде Түркістан қаласының 31 жастағы тұрғынынан 222 діни мазмұндағы кітап табылды және тіркіленді.

Шымкент станциясындағы желілік полиция бөлімінің қызметкерлері заң бұзушыға қатысты ҚР Әкімшілік құқық бұзушылық туралы Кодексінің 490-бабы 1-тармағы 3-тармақшасы (Діни әдебиетті және діни мазмұндағы өзге де материалдарды, діни мақсаттағы заттарды әкелу, әзірлеу, шығару, басып шығару және тарату) бойынша хаттама толтырып, материалдар сотқа жолданды.

2 тамызда Шымкент қаласының әкімшілік соты айыпталушыны жауапқа тартып, оған 50 АЕК, яғни 153 450 теңге айыппұл салынды», - делінген ресми хабарламада.





Фото: pixy.org


СҚО-да бүтін бір ауыл гүл өсіруді кәсіп еткен
2022 жылғы 9 тамыз 14:50

СҚО-да бүтін бір ауыл гүл өсіруді кәсіп еткен

ПЕТРОПАВЛ. ҚазАқпарат – Солтүстік Қазақстан облысы Имантау елді мекені тұрғындары гүл өсіру бизнесінен жақсы табыс тауып отыр. Ауылда петуния өсіретін жылыжайлардың саны 150-ден асты, деп хабарлайды ҚазАқпарат тілшісі.

СҚО кәсіпкерлер палатасы баспасөз қызметінің мәліметінше, «Атамекен» ҰКП өңірлерде бизнесті дамыту бағдарламаларын әзірлеуде өзгерістер енгізуді ұсынды. Бағдарламалар өңірлік ерекшеліктерді де, жаңа өндірістерді іске қосу мүмкіндігін де ескеруі тиіс. Оған мысал – СҚО-дағы Имантау елді мекені. Шамамен 2,5 мың халқы бар шағын ауыл салыстырмалы түрде қысқа мерзім ішінде «гүл өсірудің астанасына» айналды. Айыртау ауданының салық аударымдарының басым бөлігі осы елді мекеннен түседі.

«Шамамен 15 жыл бұрын менің қайын атам Ыдырыс Кузахметов петуния гүлін өсіремін деп шешті. Ол осы гүлдерге деген сұраныстың көптігін көріп, алдымен бір отбасыны бизнеске тартты. Оларға жағдай жасады, жылыжай салды. Отбасы гүл отырғызды, өсірді және атам өскен гүлдерді сатып алды. Содан кейін ол тағы бір отбасын кәсіпке тартты. Солай дамыды. Енді бірден 150 отбасы жылыжай бизнесімен айналысады. Онда 500-ден астам ауыл тұрғыны жұмыс істейді. Атам олардың «аяғына тұруға» мүмкіндік берді, бизнесті ауыл тұрғындарына табыстады да кетіп қалды», – дейді ауылшаруашылық туризмі қауымдастығының өкілі Илнар Галямшин.

Тұқым негізінен Голландия және Америкадан жеткізіледі. Бір келі тұқым шамамен 1,5 млн теңге тұрады. Голландиялық петуниялар Қазақстанның солтүстігінде жақсы өсетінін тәжірибе көрсетті.

Жергілікті тұрғындар бүгінде тәжірибелі гүл өсірушілерге айналды, олар жапырақтың шетіндегі өрнек арқылы гүлдің қандай түсте болатынын анықтайды. Арнайы оқытудан өтпей-ақ тәжірибе арқылы меңгеріп алды. Олар қазір гүлді суаруда заманауи технологияларды қолданып жатыр.

«Тұрғындар бірін-бірі үйретті десе болады. Олар бастапқыда жұмыла жұмыс істеді, кейін үйлерінде жылыжайларын салып, өздері өсіре бастады. Ауылдастар бір-біріне бәсеке емес, өйткені сұраныс көп. Дегенмен, біреудің гүлдері әдемі, біреудің жылыжайы жақсы деген сыңайда алға ұмтылыс байқалады», – дейді Илнар Галямшин.

Гүл бизнесі Имантауда мемлекеттен еш қолдаусыз дамыды десе болады. Заманауи технологиялық жылыжайдың орташа құны бүгінде 10 млн теңгеге дейін жетеді. Мемлекеттік қаржылай қолдау үшін өтініш білдіргендер аз. 2019 жылы «Бизнестің жол картасы» бағдарламасы бойынша тұрғындардың бірі инновациялық грант алды, қаражатты дәнекерлеу жабдығына – жылыжайлар үшін пештер жасауға жұмсады.

Ильнар Галямшиннің айтуынша, қазір бүкіл ел Имантау петуниялары туралы біледі. Тіпті ең шалғай аймақтардан да осында арзан әрі сапалы гүлдер үшін келеді.

«Гүлді қайда өткіземін деп алаңдаудың қажеті жоқ. Барлығы бірінен бірі естиді. Негізінен Нұр-Сұлтан, Көкшетау және Петропавлдан келіп алады. Егер астананың маңайында, мысалы, бір ғана жылыжай болса, оған ешкім бармайды. Ал Имантауда 150 жылыжай бар, барлығы осында келеді. 2021 жылы Шымкенттен келіп, петуния гүлдерін сатып әкетті. Олар наурызда тұқым еккен, бірақ үсік жүріп, осы жақтан қайтадан сатып алуға тура келді», – дейді Ильнар Галямшин.

Гүл өсірудің өз қиындықтары бар, бірақ имантаулықтар басқа кәсіп іздеуді жоспарлаған емес. Ауылдағы жер мен жылжымайтын мүліктің құны қазір астанадағымен бірдей, өйткені мұнда жылыжайдың болуы – табысты бизнестің кепілі.

«Бір үй бір маусымда жүз мың гүл өсірсе, пайдаға кенеледі. Құны 45 теңге болса, осы көлемнен табыс 4 млн теңгеден асады. Жергілікті тұрғындар тамақ ішпей, ұйықтамай жұмыс істейтін уақыт – наурыз, сәуір, мамыр. Қалған айларда тек дайындық және жөндеу жұмыстары жүргізіледі. Әр жылыжайда кемінде 3-4 адам жұмыс істейді. Отбасы өз бетінше 50 мың тал өсімдік өсіре алады. Сонымен қатар, егер мұнда сатып алу бағасы 45 теңге болса, қалада мұндай петуниялардың құны бір гүлге 600 теңгеге жетеді», – дейді жергілікті тұрғындар.

Гүл өсірушілердің айтуынша, жалғыз мәселе – жұмыс қолының жетіспеушілігі. Қосымша жұмыс күшіне жергілікті гүл өсірушілер күніне бес мың теңгеден төлеуге дайын. Бұл ауылдық жер үшін өте жақсы баға.

Айыртау ауданы бюджетінің 16 %-ы қазір гүл бизнесіне тиесілі.

«Біз мұнда тіпті елордадан келген агротуристерді де алып келеміз. Біз оларға ауылда тұру және жұмыс істеу әлдеқайда тиімді екенін көрсетеміз», – дейді Ильнар Галямшин.




Jańalyqtar

Үрдіс

MURAǴAT