СҚО-да аутист балалармен айналысатын мамандар тапшы
СҚО Аймақтық коммуникацилар қызметінде өткен брифингте белгілі болғандай, Солтүстік өңір - аутистік спектрі ауытқыған балалар саны бойынша республикада алдыңғы үштікке еніп отыр.
Мамандардың айтуынша, СҚО-да 2010 жылдан бастап аутизм дертіне шалдыққан бүлдіршіндер саны күрт өскен. Осыдан 9 жыл бұрын тек 31 балаға ғана бұл диагноз қойылса, бүгінгі күні олардың саны 416-ға жеткен. Оның 236-сы Петропавл қаласынан.
«Былтыр Петропавлдағы №21 орта мектепте осы дертке шалдыққан 7 балаға арналған қолдау кабинеті ашылды. Балалар сабақтан тыс уақытта келіп, бұл жерде олардың қабілетін дамытуға арналған жаттығулар жасайды. Биыл тағы қаладағы № 23,27,43 мектептерде де осындай кабинеттер ашылмақшы», - дейді СҚО әкімдігі білім беру басқармасы жетекшісінің орынбасары Татьяна Протопопова.
Ал облыстық инклюзивті коррекциялық мектеп-интернатында 37 бала оқиды. Петропавл қаласындағы 6 балабақшада 15 арнайы топ ашылған. Алайда аутист балалармен айналысатын мамандар тапшы. Мамандардың айтуынша, қазір СҚО-да жалғыз ғана балалар психиатры жұмыс істейді екен.
Бүкіләлемдік аутизм мәселесі туралы ақпарат тарату күніне орай облыста көптеген іс-шаралар жоспарланған. Мәселен, сырқат балалар А.Винокуров атындағы спорт сарайына, театрларға, оқушылар сарайына саяхат жасайды, түрлі акциялар мен мерекелік шаралар өтеді.