СҚО-да Ashyq нысандарына демалыс күндері тек «жасыл» мәртебесі бар тұрғындар ғана кіре алады
СҚО бас санитар дәрігерінің жаңа қаулысына сәйкес, Ashyq жобасына қатысатын барлық кәсіпкерлік нысаны 28 тамыздан бастап түнгі сағат 00.00-ге дейін, ал жоба көшбасшылары түнгі сағат 02.00-ге дейін жұмыс істей алады. Алайда демалыс күндері бұл нысандарға тек «жасыл» мәртебесі бар тұрғындар ғана кіре алады.
«Бұл нысандарға демалыс күндері вакцина алғандар немесе 7 күнге жарамды ПТР тесті бар адамдар, денсаулығына байланысты вакцинаға қарсы тұрақты медициналық көрсетілімі бар немесе коронавируспен ауырғанына 3 ай өтпегендер кіре алады. Ал 30 тамыздан бастап, жай күндері «көк» және «жасыл» түсті мәртебесі барларға кіруге рұқсат. Демалыс күндері қайтадан «жасыл» түстілер ғана кіреді. Бұл жағдайдың қанша уақытқа дейін созылатыны әзірге белгісіз. Қызметкерлер де дәл осы талаппен жұмысқа кіреді», - дейді СҚО санитариялық-эпидемиологиялық бақылау департаменті басшысының орынбасары Арман Күшбасов.
Шектеу шараларын бұзғандарды анықтау бойынша өңірде жұмыстар жалғасып жатыр. Тамыз айының басынан мониторингтік топтар 1775 нысанды қамти отыра 224 рейд жүргізген. Нәтижесінде 49 тұлға анықталып, оларға 2,9 млн теңге айыппұл салынды.
Үй карантині режимін бұзған адамдарды жауапкершілікке тарту жұмыстары да жалғасады. Ashyq жобасын енгізген нысандарға кіруге тырысқан 17 адам жауапкершілікке тартылды.