СҚО-да 21 мыңнан астам адамның салық бойынша қарызы кешіріледі
Мемлекет басшысының салықтық рақымшылық туралы Жарлығына сәйкес, ел тұрғындарының 2019 жылдың 1-қаңтарына дейінгі салықтары бойынша өсімақылары есептен шығарылады. 13-тамыздан бастап өсімақы сомасын Есептен шығару ережелері қолданысқа енгізілді.
СҚО бойынша Мемлекеттік кірістер департаментінің мәліметінше, акция жыл соңына дейін жүзеге асады. Салық бойынша қарызы бар кез-келген қазақстандықтың өсімпұлы есептен шығарылады.
Қазіргі уақытта 21 мыңнан астам солтүстікқазақстандықтың 2019 жылдың 1 қаңтарына дейінгі кезең үшін салық бойынша берешегі бар. Жалпы берешек - 449,2 млн теңге. Оның 340,9 млн теңгесі негізгі қарыз болса, өсім - 108,3 млн теңгені құрайды. Есептен шығаруға жататын өсімпұлдың сомасы да осы 108,3 млн теңге.
Бюджетке берешек жеке тұлғалардың басым бөлігі, яғни 92,8% көлік салығын уақтылы төлемеген автокөлік иелері. Олардың жалпы қарызы - 416,8 млн теңге.
Алайда акцияға қатысып, өсімпұлды есептен шығару үшін алдымен негізгі борышты өтеу қажет. Негізгі және жалғыз талап – осы.
Қазіргі уақытта мемлекеттік кірістер органдары күн сайын жеке тұлғалардың жеке шоттарына мониторинг жүргізуде. Олар негізгі қарызды төлеген жағдайда 3 жұмыс күні ішінде өсімпұлды есептен шығару туралы тиісті шешім шығарылады. Салық төлеушілерге ол үшін бір жерге бару қажеті жоқ.
Естеріңізге сала кетейік, осы жылдың 1 қаңтарында салық бойынша борыш 1,4 млн-ға жуық қазақстандықта болған. Берешектің жалпы сомасы 20,9 млрд теңге. Оның 6,6 млрд теңгесі – өсімақы.
Қарыз туралы ҚР ҚМ МКК www.kgd.gov.kz сайтында «Салық берешегінің жоқ/бар екендігі туралы мәліметтер» бөлімінен білуге болады.