СҚО биыл наурызды ерте тойлай бастайды
Наурыз мерекесі ертең Көрісу мейрамынан бастау алады. Осыған байланысты өңірдегі балабақшалардан бастап, кәсіпорын, мекемелерде арнайы мерекелік шаралар өтпек. Наурыздың 15- і «Қариясы бардың қазынасы бар» тақырыбында қарттарды қолдауға бағытталған. Ал наурыздың 16-сы «Жасыл қала - Жасыл ел» тақырыбында тазалық күні болып бекітілді. Яғни сенбіліктер ұйымдастырылады, көгалдандыру жұмыстары жүргізіледі және жастар жалғызбасты қарияларға үй шаруасына қолғабыс етеді.
«17 наурызды «Отан - отбасынан басталады» деп алдық. Отбасылық құндылықтарды дәріптеуге басымдық береміз. Наурызды отбасымен қарсы алуға дайындалса екен дейміз. 18-і күні «Жас келсе - іске» деген тақырыпты алып отырмыз. Биыл жастар жылы, бұл күні негізгі үлкен мерекелік шаралар өтеді. 19-шы наурызды «Қайырымды іс» деген тақырыпта және 20-сы күні «Салт дәстүр» - негізінен мерекелік шаралар өтеді», - дейді облыстық Ішкі саясат басқармасының басшысы Әсем Рахметова.
Наурызға арналған басты мерекелік шара Петропавлдағы орталық алаңда 21-і күні өтеді деп жоспарланған. Онда 7 киіз үй тігіледі.
«Бірінші киіз үйде «Ботай мәдениеті» көрсетіледі, екінші киіз үйде «Ұлы даланың ежелгі металлургиясы», үшіншісінде «Аңшылық стилі», төртіншісінде «Алтын адам стилі», бесінші киіз үйде «Түркі дүниесінің бесігі», сондай-ақ Ұлы Жібек жолы және соңғы киіз үйде «Қазақстан - алма мен қызғалдақтың мекені» деген тақырыпта болады», - дейді облыстық Мәдениет, архивж әне құжаттамалар басқармасы басшысының міндетін атқарушы Досбол Әбдірісов.
Петропавлда Наурыз мерекесі аясында республикалық айтыс өтпек. Биыл ол солтүстікқазақстандық ақын Ерік Асқаровтың 60 жылдығына арналып отыр. Сондай-ақ мемлекеттік мекемелерде «ұлттық костюмдер апталығы» өтеді. Облыс орталығында қолөнер шеберлерінің көрмесі ұйымдастырылады.