СҚО аумағынан шығу үшін енді ПТР тест анықтамасы керек – дәрігерлер

ПЕТРОПАВЛ. ҚазАқпарат – Солтүстік Қазақстан облысында карантиндік шектеулердің күшейтілуіне байланысты бұдан былай ПТР тест нәтижесі болмаса тұрғындар өңір аумағынан шыға алмайды, деп хабарлайды ҚазАқпарат тілшісі.

СҚО Санитариялық-эпидемиологиялық бақылау департаменті мамандары өңірде карантиндік шараларды күшейтуге қатысты брифинг өткізді.

Санитария дәрігерлерінің айтуынша, ПТР-тест нәтижесі облыс аумағынан шығатын барлық жолаушыларға керек.

«СҚО-да ПТР-тестті 4 зертханада жасатуға болады. Оның бірі - Санитариялық-эпидемиологиялық бақылау департаментінің Ұлттық сараптама орталығында орналасқан. Тағы бірі – пульмонология орталығында орналасқан. Сондай-ақ екі жекеменшік клиникада жасатуға болады. Тағы бір жекеменшік зертхана қараша айының 20-сынан кейін ашылады деп жоспарланған. Онда 2 мыңға дейін тест жасатуға болады. Ұлттық сараптама орталығы жеке тұлғаларға 8 мың теңгеге, заңды тұлғаларға 9 мың теңгеге жасайды. Зертханалар үлгеріп жатыр, ешқандай дүрлігу жоқ», - дейді СҚО Санитариялық-эпидемиологиялық бақылау департаменті басшысының міндетін атқарушы Татьяна Горлова.

Санитария дәрігерінің айтуынша, соңғы кезде сырттан келушілер арасында КВИ-ді жұқтырушылар көбейген. 6 қазан мен 2 қараша аралығында Ресеймен шекаралас бақылау пункттері арқылы 15 663 адам өткен. Оның шамамен 4,5 мыңында ғана анықтама болған. 1400-дей адам карантинге алынып, COVID-19 тексерілді. Нәтижесінде 118 адамнан коронавирус анықталды. 77 шетелдік ПТР-тест нәтижесі болмағандықтан кері қайтарылған.

«Коронавирусты жұқтырушылар арасында жүк тасымалдаушылар көп. Қазан айында Ресейден келген 104 адамда КВИ анықталса, соның 24-і жүк көліктерінің жүргізушілері. Соның ішінде жүк тасымалдаушылардың 22-сі – басқа өңірлердің тұрғындары. Оларда қауіпті инфекция СҚО аумағында анықталғандықтан, осы өңірдің статистикасына кіреді», - дейді Татьяна Горлова.