Синхронды жүзуден Қарағанды спортшылары Татарстанда «алтын» алды

ҚАРАҒАНДЫ. ҚазАқпарат – Қарағандының синхроншылары әртістік жүзуден әлемдік серияның үшінші кезеңі өткен Татарстанның Қазан қаласында үздік нәтижелер көрсетті. Жарысқа 12 елдің спортшылары қатысты, деп хабарлайды ҚазАқпарат тілшісі.

Техникалық бағдарламада Каролина Иванова мен Виктор Друзиннің аралас дуэті үшінші орынға ие болды. Екатерина Симонова, Елена Крылова, Наргиз Болатова, Ксения Макарова, Этери Какутиа және Арина Мясниковадан құралған әйелдер командасы қола жүлде жеңіп алды. Ал «хайлайт» жаңа бағдарламада қыздар сол құраммен «алтын» жеңіп алды.

Барлық спортшылар «Облыстық олимпиадалық резервтің мамандандырылған жүзу спорт мектебі» КМҚК-ның тәрбиеленушілері, Виктор Друзин – Ә. Молдағұлова атындағы ОМОРМИК оқушысы.

Айта кету керек, «хайлайт» - жаңа дисциплина, 2017 жылы FINA техникалық конгресінің шешімі бойынша әлем чемпионаттарында синхронды жүзуден жарыстар бағдарламасына енгізілген. Шын мәнінде, бұл – су акробатикасы. Алғаш рет хайлайтерлер 1984 жылы көрсетілді, ал Еуропа кубогы жарыстарына 2012 жылдан бастап қосылды.