ШЫҰ байқаушылары Қазақстанның 7 қаласында сайлау процесін бақылайды
«Жаңа ғана ҚР Орталық сайлау комиссиясының төрағасы Берік Имашев мырзамен кездестік. Шанхай ынтымақтастық ұйымы байқаушылар миссиясы ҚР Сыртқы істер министрі Бейбіт Атамқұловтың шақыртуымен Нұр-Сұлтанға келді. Осы шақыртуға байланысты ҚР Президентін кезектен тыс сайлау барысын бақылайтын ШЫҰ байқаушылар миссиясы құрылды. ШЫҰ-ға жүктеліп отырған міндеттердің бірі - президент және парламент сайлауларына, референдумдарға бақылау жүргізу. Бұл жұмыс біздің ұйымда 2006 жылы қабылданған тәртіпке сай жүргізіледі», - деді Владимир Норов.
Оның айтуына қарағанда, Шанхай ынтымақтастық ұйымы байқаушылар миссиясы ең алғаш 2004 жылы Қазақстанда жұмысын бастаған.
«Шанхай ынтымақтастық ұйымы байқаушылар миссиясы мүше-мемлекеттердің 25 өкілінен тұрады. Ол өкілдер өз елдерінің заңнамалық, құқықтық салаларынан келіп қосылған. Олар - жоғары санатты саясаткерлер. Біздің миссия бүгінгі күні Қазақстанда жұмысын бастап кетті десе де болады. Біздің өкілдер Қазақстаның 7 қаласында, Нұр-Сұлтан, Алматы, Шымкент, Түркістан, Қарағанды, Атырау және Өскемен қалаларында жұмыс жүргізіп жатыр. Сонымен қатар, біз 6 аймақты, Ақмола, Алматы, Қарағанды, Атырау, Түркістан және ШҚО-ны қамтып отырмыз», - деді ол.
Владимир Норов өз сөзінде ШЫҰ байқаушылар миссиясы сайлаудың әділ өтуі үшін барынша күш салатынын атап өтті.
«7 маусымда толыққанды жұмысты бастап, 8 маусымда - тыныштық күні десек, 9-ында біздің өкілдер өз қызметін орындап, сайлау процесіне бақылау жүргізеді. Әлбетте, Қазақстанның сайлау заңнамасында біршама жаңашылдықтар барын біліп отырмыз. Бұл жаңашылдықтар ШЫҰ елдеріне де үлгі болары сөзсіз», - деді ол.
Айта кетейік, алдағы 9 маусым күні өтетін президенттік сайлауға 7 кандидат түседі.