Шымкентте карантин 25 мамырға дейін ұзартылды

ШЫМКЕНТ. ҚазАқпарат – Шымкентте карантинге байланысты шектеулер 25 мамырға дейін созылады. Бұл туралы Ақпараттық коммуникация-орталығында өткен брифингте Шымкент қаласы әкімінің бірінші орынбасары Ербол Садыр мәлім етті, деп хабарлайды ҚазАқпарат тілшісі.

Е.Садырдың айтуынша, елімізде бүгіннен бастап төтенше жағдай режимі алынғанымен, пандемияның кең таралуына жол бермеу мақсатында шаһарда карантин тәртібі сақталады. Қазіргі таңда қаланың кіреберістерінде 18 блокпост жұмыс істеп тұр. Барлық жағдай қатаң бақылауға алынып, карантин талаптары біршама жеңілдетілуде.

«Шымкент қаласы аумағында карантин тәртібі 25 мамырға дейін сақталады. Бүгіннен бастап қоғамдық көліктер таңғы 07:00 мен кешкі 21:00 аралығында тиісті санитарлық нормаларды сақтай отырып, жүре бастайды. Қала аумағындағы базарлар да ертеңнен бастап 10:00-ден 18:00 аралығында жұмыс істейді. Тек автокөлік базары мен мал базарлары ашылмайды», - деді Ербол Садыр.