+7 (701) 759 90 19
USD 436.29 EUR 492.83
RUB 5.92 CNY 68.48
Jańalyqtar

Шымкентте бойжеткенді ішінен ұрып құлатқан полицейге қатысты қызметтік тексеріс басталды

2017 жылғы 28 қыркүйек 02:33
Бөлісіңіз:
Шымкентте бойжеткенді ішінен ұрып құлатқан полицейге қатысты қызметтік тексеріс басталды

ШЫМКЕНТ. ҚазАқпарат - Шымкентте бойжеткенді ішінен ұрып құлату оқиғасы бойынша полицейлер өз уәждерін айтты. Қазіргі таңда қызды тепкен тәртіп сақшысына қатысты қызметтік тексеріс басталды.

Бұл туралы бүгін қалалық жергілікті патрульдік полиция бастығы Данияр Мейірхан мәлімдеді, деп хабарлайды ҚазАқпарат ХАА тілшісі.

Шымкент қалалық ЖПП бастығының сөзінше, дәмханада төбелес болған. Артынша екі бойжеткен «102» нөміріне хабарласып, өздерін белгісіз азаматтың ұрғанын айтқан.

«Оқиға орнына жеткен тәртіп сақшылары бойжеткендерге қол көтерген 26 жастағы азамат пен оның жанындағы азаматшаларды көлікке мінгізіп, полиция бөлімшесіне жеткізбек болады. Алайда ұсталған азамат ішкі істер қызметкерлерінің айтқанына бағынбай, қарсылық көрсетеді. Тіпті оларға қол көтерген. Кейіннен жас жігітке оның жанындағы қыз жақтаспақ болады. Куәгерлер түсірген бейнетүсірілімде полиция қызметкерінің қызға қол көтергені түсіп қалған. Қазіргі таңда қақтығысқа қатысқандардың барлығының жеке тұлғалары анықталып, куәгерлерден бейнетүсірілімдер алынып жатыр. Жетондардағы, дәмханада орналасқан бақылау камерасындағы бейнетүсірілімдер анықталып, зерттеледі. Шымкенттік Жергілікті полиция қызметі өз қызметкерінің әрекетін ақтамайды. Қызметкерлерге қатысты әрекеттерінің заңдылығын анықтау үшін қызметтік тексеріс жүріп жатыр. Нәтижесін хабарлаймыз", - дейді Данияр Мейірхан.

Ол сондай-ақ полиция қызметкерлері 26 жастағы күдіктінің бір қызды бетінен ұрғанын, екіншісінің шашын жұлғанын анықтағанын айтады. Алайда күдіктіні ұстау кезінде жанындағы бойжеткен тәртіп сақшыларына қол жұмсап, былапыт сөздер айтты деп отыр.

«Екінші куәгерлердің бейнетүсірілімінде қыздың тәртіп сақшыларына жаман сөздер айтқаны көрініп тұр. Бойжеткен тіпті ішкі істер қызметкерлеріне қарсы шығып, олардың погондарын жұлып алған. Погондарын көшеге лақтырған. Десе де бойжеткеннің бұл әрекетіне қатысты енді тиісті шаралар қарастырылатын болады. Сондай-ақ осы оқиға бойынша қазір Қылмыстық Кодекстің 293- «Бұзақылық» және 380-« Билік өкіліне қатысты күш қолдану» баптарымен іс қозғалып, сотқа дейінгі тергеу амалдары жүргізілуде. Күдікті уақытша ұстау абақтысына қамалды»,- дейді Шымкент қалалық ЖПП бастығы.

Айта кетейік, кеше таңертең Шымкенттегі дәмханалардың бірінің алдында полицейлер мен жастардың арасында төбелес болған еді. Онда полицей бойжеткендердің бірінің ішінен ұрып жіберген. Салдарынан қыз ішін ұстап, отырып қалған болатын. Бұл көріністі куәгерлердің бірі ұялы телефонына түсіріп алып, әлеуметтік желіге салған.

Біздің каналымызға жазылыңыз:

Бөлісіңіз:

Автор:

Айнұр Ақбаева

Сондай-ақ... оқыңыз
Пікір қалдыру
+7
Жіберу
ONLAIN QYZMETKERLER
REDAKTOR
Жанибек Амангелди
Жанибек Амангелди
954-059
REDAKTOR
Жанат Қапалбаева
Жанат Қапалбаева
954-059

MURAǴAT