Шымкентте 13 жастағы қызды зорламақ болған қойшы сотталды

ШЫМКЕНТ. ҚазАқпарат - Шымкентте 13 жастағы қызды зорламақ болған қойшы сотталды. Қалалық қылмыстық істер жөніндегі мамандандырылған ауданаралық соты 19 жастағы жігітті 8 жыл 5 айға бас бостандығынан айырды, деп хабарлайды Қазақпарат тілшісі.

Судья Әбинұр Қарабаев қараған сот отырысында айыпталушының қалай қылмыс жасауға оқталғаны анықталды. Белгілі болғандай жас жігіт Қайнарбұлақ елді мекенінің маңында қой бағып жүріп, жасөспірім қыздың үйінің есігін кілтпен ашып жатқанын байқап қалады. Осы жерде ол арам ойын іске асырмақ болып, үйіне келген. Алайда жәбірленуші бар дауысымен айқайлап, көршілерін көмекке шақырған. Сот үкімімен жасөспірімді зорламақ болған қойшы 8,5 жыл өмірін түрмеде өткізетін болды.

Аталған сотта тағы бір айыпталушыға 13 жыл бас бостандығынан айыру жазасы тағайындалды. Әбден ішімдікке бой алдырған үш баланың әкесі әйелін бауыздап өлтіргені үшін сотталды.