Шымкент тұрғыны халыққа тегін таратылуы тиіс дәрі-дәрмекті сатып келген

ШЫМКЕНТ. ҚазАқпарат - Шымкентте айналымы шектелген дәрі-дәрмекті заңсыз сату фактісінің жолы кесілді, деп хабарлайды ҚазАқпарат.

Қажетті емдік дәрі-дәрмек тапшылығы жағдайында Қаржы мониторингі комитетінің экономикалық тергеу қызметі еліміздің аумағында дәрі-дәрмекті заңсыз сату фактілерін анықтау және жолын кесу бойынша ауқымды жұмыс бастады.

Осылайша Шымкент қаласының экономикалық тергеу департаментіне тегін медициналық көмектің кепілденген көлемі шеңберінде берілетін дәрі-дәрмекті қолдан заңсыз сату фактісі туралы жедел ақпарат келіп түсті.

Шымкент қаласының тұрғыны рұқсат құжаты жоқ дәрі-дәрмекті заңсыз сатумен айналысқаны анықталды. Сонымен бірге, дәрілердің бір бөлігі медициналық мекемелер арқылы халыққа тегін берілуі тиіс еді.

Тегін медициналық көмек шеңберінде медициналық дәрі-дәрмекті жымқыру және оларды заңсыз сату фактісі бойынша іс қозғалды.