22:45, 11 Ақпан 2023 | GMT +6
Шымкент-Тараз тасжолында тұрып қалған көліктер өткізіле бастады
АСТАНА. ҚазАқпарат - Шымкент-Тараз бағытында ауа райына байланысты тұрып қалған көліктер өткізіле бастады, деп хабарлайды ҚазАқпарат ҚазАвтоЖолға сілтеме жасап.
«Шымкент-Тараз бағытында арнайы техниканың және жергілікті полицияның сүйемелдеуімен көлік құралдарын өткізу жұмыстары басталды. Жол қызметтері қысқы күтіп-ұстау жұмыстарын жалғастыруда»,- делінген хабарламада.
Айта кетсек бүгін Жамбыл ауданында «Алматы-Термез-Ташкент» тасжолының учаскесі жабылып (534-593 км), 150 жеңіл көлік пен 250 жүк көлігі және 30 жолаушылар автобусы тоқтатылды.
Жамбыл ауданында ыстық тамақпен қамтамасыз етілген 3 жылыту пункті ашылды. Адамдар қажет болған жағдайда жылыту пунктіне жеткізіледі.
Жамбыл облысындағы боранға байланысты жедел желі іске қосылды.