Шығыс Қазақстанда биыл 15 өрт бекеті ашылады
ШҚО төтенше жағдайлар департаментінің мәліметіне сүйенсек, қазір өңір бойынша 63 өрт бекеті бар. Олар өрт сөндіру қызметі жоқ елді мекендерде орналасқан. Мұндағы мақсат – тұрғын үйлерде және далада шыққан қызыл жалынды жылдам ауыздықтау.
«Жыл сайын облыста жаңа өрт бекеттері құрылуда. Өткен жылы осындай 4 бекет (Бородулиха ауданында – 2, Ұлан ауданында – 1, Көкпекті ауданында – 1) ашылған. Биыл олардың саны тағы 15-ке көбеймек (Бесқарағай ауданында – 3, Глубокое ауданында – 3, Катонқарағай ауданында – 2, Үржар ауданында – 2, Бородулиха, Жарма, Зайсан, Тарбағатай және Алтай аудандарында бір-бірден). Сәуір айынан Шемонаихадағы өрт бекеті өз жұмысын бастаған», - деп хабарлады ведомство өкілдері.
Бекеттер ауылдардан 20 шақырымдай жерде орын тебеді. Онда 4 адам тәулік бойы кезекшілік атқарады. Әр өрт бекеті сол маңдағы төрт елді мекендегі өрт ахуалын бақыламақ.