19:50, 08 Тамыз 2021 | GMT +6
Шығыс Қазақстанда 2 гектарға жайылған орман өрті ауыздықталды
ӨСКЕМЕН. ҚазАқпарат – Шығыс Қазақстан облысында 2 гектарға жайылған орман өрті сөндірілді, деп хабарлайды ҚазАқпарат тілшісі.
ШҚО төтенше жағдайлар департаменті баспасөз қызметінің мәліметіне сүйенсек, 8 тамызда «Өскемен орман шаруашылығы» КММ-ге қарасты Серебрянск орманшылығы аумағында өрт шыққан.
Жалын ормандағы ағаштарды шарпыды.
«Оқиға орнына жедел келген өрт сөндірушілер мен орманшылар тілсіз жаумен күресті. Өрттің жалпы аумағы 2 гектарды құраған. Көп ұзамай от толықтай өшірілді», - деп хабарлады ведомство өкілдері.
Айта кетейік, өртті сөндіруге жеке құрамнан 20 адам мен 4 техника, «Өскемен орман шаруашылығы» КММ 9 қызметкері мен 2 техникасы, МИ-2 тікұшағы, жергілікті атқарушы орган өкілдері және 2 десантшы жұмылдырылды.
Қазіргі уақытта оттың шығу себебі анықталып жатыр.