21:25, 29 Қараша 2021 | GMT +6
Шығыс Қазақстан тауларында жасанды жолмен қар көшкіні түсірілді
ӨСКЕМЕН. ҚазАқпарат – Шығыс Қазақстан облысында жасанды жолмен қар көшкіні түсірілді, деп хабарлайды ҚазАқпарат тілшісі.
ШҚО төтенше жағдайлар департаменті баспасөз қызметінің мәліметіне сүйенсек, қар көшкінінің алдын алу шаралары «Өскемен-Самар» тасжолының 92-101 шақырымында жүргізілді.
«Құтқарушылар мен «Қазселденқорғау» мекемесінің мамандары 4 жарылыс жасады. Жалпы 790 текше метр қар түсірілген. Алайда өңір бойынша қар көшкіні қаупі әлі де сақталып отыр. Халыққа тауға барған кезде қауіпсіздік ережелерін қатаң сақтау керектігін ескертеміз», - деп хабарлады ведомство өкілдері.
Айта кетейік, Шығыс Қазақстандағы 497 жол учаскесінде қар көшкіні жүруі мүмкін.
Әсіресе Өскемен-Самар, Өскемен-Алтай, Согорное-Барлық, Берел-Рахман қайнарлары, Зубовка-Путинцево және Лениногорск-Чекмарь кеніші тасжолдарының бойындағы учаскелер аса қауіпті.