Шығыс Қазақстан облысында 20 адамды кене шақты

ӨСКЕМЕН. ҚазАқпарат – ШҚО денсаулық сақтау басқармасы баспасөз қызметінің мәліметіне сүйенсек, наурыз айының аяғынан бастап осы уақытқа дейін өңір аумағында 20 адамды кене шаққан, деп хабарлайды ҚазАқпарат тілшісі.

Оның ішінде Өскемен қаласында – 12, Глубокое, Ұлан және Алтай аудандарында – 2 адам кенеден зардап шеккен.

«Статистика көрсеткендей, кене энцефалиті эпидемиологиялық маусымында облыс бойынша көп жағдайда Өскемен тұрғындары ауруханаға жүгініп жатады. Ересектер №4 қалалық аурухананың қабылдау бөліміне, ал балалар Ана мен бала орталығында қаралады. Бүгінгі таңда жалпы Шығыс Қазақстанда зардап шеккендерге және кене энцефалитінің алдын алу үшін халыққа салынатын иммуноглобулиннің мөлшері жеткілікті», - делінген ақпаратта.

Еске салсақ, осыған дейін ШҚО дәрігерлерінің сирек жасалатын әдіспен жас жігіттің аяғын сақтап қалғаны хабарланған.