ШҚО тұрғынының салақтығынан 10 тонна шөп өртеніп кетті

ӨСКЕМЕН. ҚазАқпарат – Шығыс Қазақстан облысы Глубокое ауданында өрт сөндірушілер 110 шаршы метрге жайылған жалынды сөндірді, деп хабарлайды ҚазАқпарат тілшісі.

ШҚО Төтенше жағдайлар департаменті баспасөз қызметінің мәліметіне сүйенсек, Быструха ауылындағы Заречная көшесінде орналасқан жеке тұрғын үй ауласында өрт шыққан. Оқиға орнына құтқарушылар келіп жеткенше шаруашылық қора-жайлардың ағаш құрылымдары жанып жатты. Сонымен қатар тілсіз жау 10 тонна шөпке тарап кеткен.

«Өрт сөндірушілер көп ұзамай жалпы ауданы 100 шаршы метрге жеткен қызыл жалынды өшірді. Ең бастысы, тұрғын үйге бір метр ғана қалған өрттің әрі қарай таралуына жол берілмеді», - деп хабарлады ведомство өкілдері.

Алдын ала мәлімет бойынша өрттің шығуына отты пайдалану кезіндегі салақтық себеп болған. Өртті сөндіруге жеке құрамнан 6 адам мен 2 техника жұмылдырылды.