ШҚО тұрғынынан қару-жарақ арсеналы тәркіленді
ШҚО полиция департаменті баспасөз қызметінің мәліметіне сүйенсек, тәртіп сақшылары Алтай ауданы Серебрянск қаласында жедел-іздестіру шараларын жүргізу барысында тіркелмеген қару-жарақ арсеналын тапты.
«Қала тұрғыны жеке тұрғын үй аумағында бес тегіс ұңғылы мылтықты, ұсақ калибрлі мылтықтың ұңғысын, үш аңшылық пышақты және 50-ден астам оқ-дәріні заңсыз сақтаған. Қазіргі уақытта полицейлер тіркелмеген қарудың қайдан алынғанын анықтап жатыр.
Баллистикалық сараптама тағайындалды», - делінген ақпаратта.
Ведомство дерегінше, бүгінде өңірде «Қару тапсыр» акциясы өтіп жатыр.
Соның аясында заңсыз сақталған қару-жарақты өз еркімен тапсырған азаматтар қылмыстық және әкімшілік жауапкершіліктен босатылады.
Сондай-ақ қаруды тапсырғаны үшін оның техникалық күйін ескере отырып республикалық бюджеттен 10-нан 100 АЕК-ке дейінгі мөлшерде төлем беріледі.
