ШҚО тұрғындары биыл ХҚО-дан 1,5 млн қызмет алды
«Азаматтарға арналған үкімет» мемлекеттік корпорациясы ШҚОФ директоры Азамат Есембуловтың айтуынша, реестрдегі 690 мемлекеттік қызметтің 662-і корпорациясы арқылы көрсетілген.
Оның 645-і электронды форматта қолжетімді.
«Жыл басынан бері өңір жұртшылығына ХҚО-лар арқылы 1,5 млн-нан астам мемлекеттік қызмет көрсетілді. Бұл өткен жылдың сәйкес кезеңімен салыстырғанда 15%-ға артық. 2021 жылы электронды қызметтерді өз бетінше алу көрсеткіші де өскен. Мәселен, былтыр тұрғындар өздері 900 мыңнан астам қызметті өздері алса, биыл бұл көрсеткіш 1 млн-ға жетті. Бұл жерде коронавирус пандемиясының әсері бар», - деді ол онлайн форматта өткен баспасөз конференциясында.
Сондай-ақ автокөлік иелері қызметтерді жиі онлайн ала бастаған.
Осы жылдың басынан бері мамандандырылған ХҚО-да шығысқазақстандықтар өз бетінше 26 мыңнан астам мемлекеттік қызмет алған.
Оның ішінде 10 мыңға жуық азамат автокөлікті қайта тіркеуден өткізсе, 3 мыңнан астамы жүргізуші куәлігін онлайн өтініш беру арқылы ауыстырды.