ШҚО құтқарушылары: Балық аулау – қауіпті хобби
«Процестің қызықты екендігі сонша, балық аулауды ұнататындар өзендерге немесе көлдерге кейбір жағдайларға қарамастан барады және оның соңы қайғылы оқиғаға да әкеп соғып жатады. ТЖД қызметінің қысқы қорытындыларында балықшылармен болған оқиғалар туралы ақпарат жиі кездеседі», - дейді ШҚО ТЖД жедел құтқару жасағының құтқарушысы Владимир Субботин.
Құтқарушы балық аулауға шыққанда ілмегі бар арқан алып жүруді ұсынады.
«Бір ұшында пышақ немесе ілмек болса, сәтсіздікке ұшыраған жағдайда мұздың шетіне ілініп, судан шығуға болады. Бұрғыны түзетілген күйде алып жүру керек, ол құтқару құралы бола алады. Төтенше жағдайда құтқарушыларға қоңырау шалу үшін зарядталған телефонды алып жүріңіз. Алкогольді қабылдамаған дұрыс: адам оны тұтынған кезде алдымен тамырлардың кеңеюі, содан кейін олардың тарылуы пайда болады, бұл тез қатып қалуға әкеледі», - дейді ол.
Сондай-ақ, мұздағы қауіпсіздік шаралары:
- ең алдымен, мұздағы жолды немесе іздерді табыңыз. Егер олар болмаса, жағадан қозғалыс бағытын белгілеңіз.
- күдікті жерлердің бар-жоғын алдын ала қараңыз.
- су ағыны тұсында мұз әлсіз болуы мүмкін екенін ұмытпаңыз. Бұталардың, қамыстың жанында, қар үйінділерінің астында, балдырлар мұзға қатып қалған жерлерде жұқа және сынғыш мұз болады.
- мұздың беріктігін тексеру үшін өзіңізбен бірге таяқ алыңыз. Ешбір жағдайда мұздың беріктігін аяғыңыздың соққысымен тексермеңіз!
- түнде мұзға шықпаңыз.
- мұз жарыла бастаған жағдайда, дереу кері қайту керек, тек жүгірмеңіз, бірақ аяғыңызды мұздан көтермей баяу жүріңіз!
- бір-біріне жақын жерден мұзды көп теспеңіз.
- бір жерде үлкен топтарға жиналмаңыз.
Егер сіздің астыңыздағы мұз сынса:
- қолдарыңызды мұздың шетіне қойыңыз, сонда сіз бетінде қалып, мұздың астына түспейсіз және көмекке шақыра аласыз.
- сабырлы болуға тырысыңыз.
- оқыс қимыл жасамаңыз, алдымен кеудеңізбен мұз бетіне шығуға тырысыңыз, содан кейін аяғыңызды кезекпен созыңыз.
- мұз тұтқынынан шыққаннан кейін айналаға карап, қай жақтан келгеніңізді байқаңыз және мұздың беріктігі тексерілген жерге қарай жүріңіз.
Мұз астына түскен адамға көмек көрсету кезінде оған жақындауға болмайды. Қолыңызда ұзын таяқша, тақта, арқан немесе басқа заттар болса жақсы, оларды көмек көрсету үшін пайдалану керек. Егер ештеңе болмаса, онда сіз импровизацияланған құралдармен – белбеумен, шарфтармен, курткамен көмек беруге тырысу керек. Бірақ, көмек көрсету үшін қосалқы заттар жоқ жағдайлар болуы мүмкін. Бұл жағдайда бірнеше адам мұзға жатып, жәбірленушіге қарай тізбектеліп, бір-бірін аяғынан ұстап тұрады, ал біріншісі жәбірленушіге белдік, арқан және т.б. беруіне болады.
Адамның мұзда қауіпсіз болуының негізгі шарты: мұздың қалыңдығының берілген жүктемеге сәйкестігі:
- бір адамға арналған мұздың қауіпсіз қалыңдығы – кемінде 7 см;
- жаяу өткел салу үшін мұздың қауіпсіз қалыңдығы – 15 см және одан да көп;
- көліктердің өтуі, бұқаралық спорттық және мерекелік іс-шараларды ұйымдастыру үшін мұздың қауіпсіз қалыңдығы – 30 см және одан да көп.
Дауылды ескертулер, алдағы күн райының өзгеруі туралы ақпаратты ескеру керек. Егер боран, қар еру, көріну шектеулі болса, онда адасып кету ықтималдығы өте жоғары. Ескертулерді тыңдап, балық аулауға шықпаған дұрыс.
Балық аулау үшін тек сыналған және жақсы зерттелген жерлерді таңдаңыз. Бұл балық аулаудың еш қиындықсыз өтуін қамтамасыз етеді, сіз көңілді боласыз және үйге аман-есен ораласыз.
Төтенше жағдай кезінде 112 нөмірі бойынша хабарлаңыз.
Айта кетсек, өңірде балық аулау кезінде су айдындарында 2020 жылы 3 адам, 2021 жылы 4 адам, 2022 жылы 1 адам суға батып кетті.
