ШҚО екі ауданында бастауыш сынып оқушылары мектепте бармайды

ӨСКЕМЕН. ҚазАқпарат – Шығыс Қазақстан облысындағы бірнеше ауданда көктайғаққа байланысты екінші ауысымдағы 1-4 сынып оқушылары онлайн оқиды, деп хабарлайды ҚазАқпарат тілшісі.

ШҚО төтенше жағдайлар департаменті баспасөз қызметінің мәліметіне сүйенсек, 9 желтоқсанда қатты жел соғуына байланысты кейбір аудандарда екінші ауысымдағы оқушылар онлайн форматта оқитын болды.

«Тарбағатай ауданында 1-4 сыныптар мектепке бармайды. Сондай-ақ Көкпекті ауданындағы Шайжүнісов, Құйбышев, Әуезов, Пушкин атындағы білім ордаларында 1-4 сыныптар қашықтан білім алады», - деп хабарлады ведомство өкілдері.

Айта кетейік, бүгін таңертең қатты жел мен боранға байланысты Күршім, Көкпекті, Тарбағатай және Шемонаиха аудандарында оқушылар онлайн оқыған болатын.