ШҚО-да жұмыссыздарға жеке кәсібін ашуға биыл 600-ден астам грант бөлінеді
ШҚО Жұмыспен қамту және әлеуметтік бағдарламаларды үйлестіру басқармасының мәліметіне сүйенсек, өңір бойынша жыл басынан бері 6587 жұмыс орны құрылған. Сондай-ақ ұлттық жобаларды іске асыру аясында 147 жоба қолға алынып, 3 498 жұмыс орны ашылады деп жоспарлануда.
«Биыл жұмыспен қамту органдарына 14 мыңнан астам адам өтініш білдірген. Оның ішінде 12 мың азамат республикалық жобаларға қатысып, 8 мыңы жұмысқа орналасты. 2022 жылдың екінші тоқсанының қорытындысы бойынша Шығыс Қазақстанда жұмыссыздық деңгейі 4,8 пайызды, жастар арасындағы жұмыссыздық 3,7 пайызды құрап отыр», - дейді басқарманың еңбек көші-қоны және еңбек нарығы мониторингі бөлімінің басшысы Мерхат Қабдешов.
Оның айтуынша, осы жылы облыстағы жұмыссыздар мен өзін-өзі жұмыспен қамтығандарға бизнес-идеяларын жүзеге асыру үшін 745 миллион теңгенің 608 грантын беру көзделуде.