ШҚО-да жолда тоңып қалған жолаушылар жылыту пунктіне жеткізілді

ӨСКЕМЕН. ҚазАқпарат – Шығыс Қазақстан облысында полицейлер Талдықорғанға бара жатқан шағын автобусты тоқтатты, деп хабарлайды ҚазАқпарат тілшісі.

ШҚО Полиция департаменті баспасөз қызметінің мәліметіне сүйенсек, 3 қаңтарда сағат 21:30 шамасында полиция қызметкерлері «Алматы-Өскемен» тасжолында «Mercedes-Benz Sprinter» маркалы шағын автобусты тоқтатты. Анықталғандай, «Зайсан-Талдықорған» бағытында келе жатқан автобуста 18 жолаушы болған.

Сондай-ақ, сақшылар аталған тасжолдың 778 шақырымында «JAT» жүк көлігін тоқтатты. Жүргізуші мен төрт жолаушы «Павлодар-Талдықорған» бағытымен жолға шығыпты.

«Бұдан бірнеше сағат бұрын республикалық және облыстық маңызы бар тасжолдарда уақытша көлік қозғалысы шектелген болатын. Сондықтан полицейлер суық көлік ішінде жаурап қалған азаматтарды жылыту пунктіне жеткізді», - деді ШҚО ПД бастығы Сағат Мәдиев.

Айта кетейік, облыста ауа температурасы 40 градусқа дейін төмендеді.