ШҚО-да зейнеткерді тонаған ұры ұсталды

СЕМЕЙ. ҚазАқпарат - Зырян ауданында зейнеткерді тонаған ұры ұсталды. Бұл туралы ҚазАқпарат облыстық ІІД баспасөз қызметіне сілтеме жасап хабарлайды.

31 тамыз күні Зырян аудандық Ішкі істер басқармасына 61 жастағы әйел арызданған. Айтуынша, үйіндегі жөндеу жұмыстары кезінде белгісіз біреу алтын әшекей бұйымдарын ұрлап кеткен. Жалпы шығын көлемі 395 мың теңге.

Полиция қызметкерлері хабар түскеннен кейін жедел іздестіру шараларына кіріскен. Арада ұзақ уақыт өтпей ұрының жеке тұлғасы анықталып, оның 32 жастағы аудан тұрғыны екені белгілі болды.  

Әлгі әйел үйіндегі жөндеу жұмыстарына көмектесу үшін жергілікті тұрғындардың көмегіне жүгінген.  Ал азамат бір ай бойы жұмыс істей жүріп, үй иесінің ақшасы мен бағалы заттарының қайда тұратынын білген. Кейін алтын әшекей бұйымдарды жымқырып, ломбардқа өткізген. 

«Тергеу кезінде азамат кінәсін мойындады. Қазір ҚР ҚК-нің 188 бабы, 1-ші тармағы (Ұрлық) бойынша сотқа дейінгі тергеу басталды»,- делінген хабарламада.