ШҚО-да суға түсуге тыйым салынған 64 учаске тіркелді
ШҚО төтенше жағдайлар департаменті баспасөз қызметінің мәліметіне сүйенсек, құтқарушылар өңірде тыйым салынған шомылу орындарының тізімін белгіледі.
«Жаз шығып, күннің жылынуымен аймақта су жағасына барып демалушылар саны арта түседі. Өткен жылы Шығыс Қазақстанда суға шомылу маусымында 31 адам суға батқан. Барлық жазатайым оқиғалар жабдықталмаған шомылу орындарында болды. Қазіргі уақытта Шығыс Қазақстан облыстық мәслихатының шешімімен азаматтардың шомылуына рұқсат етілмеген 64 учаске анықталды», - делінген хабарламада.
Бұл су айдындарында тыйым салу белгілері орнатылған. ТЖД құтқарушылары жүргізген көпжылдық талдау көрсеткендей, мұндай қауіпті су айдындарында ағын өте күшті.
Оның түбін сүңгуірлер тексермеген, сондықтан өзендерде адам денсаулығына қауіп төндіретін және өліміне әкелетін тастар, арматуралар және басқа да заттар бар.
Сондай-ақ тереңдігі төрт және одан бірнеше метр терең шұңқырлар болуы мүмкін.
«Демалушыларды қауіпсіздік мақсатында арнайы шомылуға жабдықталған орындарға баруға шақырамыз. Өңір бойынша ондай 16 жер бар. Құтқарушылар суға түсуге тыйым салынған учаскелерді жаз бойы патрульдейтін болады» делінген ақпаратта.