ШҚО-да полиция қызметкерлері борышкерлерден 17 млн теңге өндірді

ӨСКЕМЕН. ҚазАқпарат – Шығыс Қазақстан облысында полиция қызметкерлері «Борышкер» жедел алдын алу шарасы барысында 17 млн теңге өндірді, деп хабарлайды ҚазАқпарат тілшісі

ШҚО Полиция департаменті баспасөз қызметінің мәліметіне сүйенсек, «Борышкер» жедел алдын алу шарасы аясында тәртіп сақшылары әкімшілік айыппұлдарды өндіруге кіріскен.

Іс-шараның үш күнінде полиция қызметкерлері мемлекет бюджетіне 17 млн теңгеден астам қаражат өндіріп алды. 2 000-нан астам азаматқа әкімшілік айыппұл берешектері туралы хабарланды. Сонымен қатар әкімшілік құқық бұзушылық туралы қаулыларды орындамағаны үшін мамандандырылған тұраққа 110 автокөлік жеткізілген.

«Мәселен, полицейлер жалпы сомасы 1 млн теңгеден асатын 54 әкімшілік құқық бұзушылық жасаған жүргізушіні анықтады. Оның автокөлігі қарызды толық өтегенге дейін арнайы тұраққа қойылды», - деді ШҚО ПД Әкімшілік полиция басқармасының бастығы Ернар Базаров.