ШҚО-да полиция бекетінен есірткі алып өтпек болған ер адам ұсталды
ШҚО Полиция департаменті баспасөз қызметінің мәліметіне сүйенсек, «Құқық тәртібі» жедел-алдын алу шарасын жүргізу барысында Шемонаиха шаһарындағы «Рубеж» стационарлық полиция бекетінде тәртіп сақшылары «Тойота» автокөлігін тоқтатқан. Қызметтік-іздестіру итінің көмегімен көлік салонын тексеру кезінде 43 жастағы жолаушының жейдесінің қалтасынан есірткі табылды.
«Өсімдік тектес, өткір иісті, қоңыр-жасыл түсті зат бар түйіншек тәркіленді. Сараптама қорытындысына сәйкес, оның салмағы 3,41 грамм кептірілген марихуана екендігі анықталды. Өскемен қаласының тұрғыны есірткіні Шемонаиха ауданы Усть-Таловка кентіндегі Үбі өзенінің жағасынан өзі пайдалану үшін жұлып алғанын түсіндірді», - делінген хабарламада.
Қазіргі уақытта аталған факті бойынша ҚР ҚК-нің 296-бабы 2-бөлігіне сәйкес сотқа дейінгі тергеу амалдары басталды.