ШҚО-да қылмыстық топтан 137 млн теңгенің психотроптық заты тәркіленді

ӨСКЕМЕН. ҚазАқпарат – Шығыс Қазақстан облысының полиция қызметкерлері қылмыстық топтың жолын кесті, деп хабарлайды ҚазАқпарат тілшісі.

ШҚО полиция департаменті баспасөз қызметінің мәліметіне сүйенсек, тергеу басқарамасының полицейлері Өскемен қаласының аумағында психотроптық заттарды саудалаумен айналысқан ұйымдасқан қылмыстық топ мүшелерін анықтады.

Тергеу барысында әшкереленген ұйымдасқан қылмыстық топ құрамындағы 5 күдікті уақытша ұстау изоляторына қамауға алынған. Тәркіленген психотроптық заттардың көлемі 5,5 келіні құрады. Оның «қара нарықтағы» бағасы - 137 млн теңге», - деді ШҚО ПД бастығы Сағат Мадиев.

Қазіргі уақытта сотқа дейінгі тергеуді аяқтау және істі одан әрі сотқа жіберу үшін прокуратураға жолдау бойынша шаралар қабылдануда.