ШҚО-да көліктері батпаққа батып қалған 9 адамға көмек көрсетілді

ӨСКЕМЕН. ҚазАқпарат – Шығыс Қазақстан облысында құтқарушылар көліктері батпаққа батып қалған 9 адамға көмек көрсетті, деп хабарлайды ҚазАқпарат тілшісі.

ШҚО Төтенше жағдайлар департаменті баспасөз қызметінің мәліметіне сүйенсек, «112» нөміріне қоңырау шалған азамат Бұқтырмадағы демалыс базаларының біріне барар жолда ауа-райының қолайсыздығынан көліктері батпаққа батып қалғандығын айтқан. Осылайша, 9 адам жолда қалды.

«Құтқарушылар жол талғамайтын техникамен оқиға орнына жедел келіп жетті. 9 адам, оның ішінде 1 бала эвакуацияланды. Екі автокөлік батпақтан сүйретіліп шығарылды. Содан кейін саяхатшылар өз жолдарын ары қарай жалғастыра алды», - деп хабарлады ведомство өкілдері.

Осы ретте, ТЖД мамандары өңір жұртшылығынан алыс жолға шыққанда қауіпсіздік шараларын қатаң сақтау қажеттігін ескертеді. Қолайсыз ауа райында жетуі қиын жерлерге бармаған жөн.