ШҚО-да Қасым Қайсеновке арналған көрме ашылды

ӨСКЕМЕН. ҚазАқпарат – Шығыс Қазақстан облыстық этнографиялық музейінде Қазақстан Жазушылар одағының мүшесі, Халық Қаһарманы Қасым Қайсеновтің шығармашылығына арналған көрме ашылды, деп хабарлайды ҚазАқпарат тілшісі.

Көрмеде жазушының музей-қорықтың қор топтамасынан алынған кітаптары, киімдері және мемориалдық бұйымдары қойылып отыр.

«Мұнда еліміз тәуелсіздік алған жылдары Қасым Қайсеновтің «Халық қаһарманы» атағын Елбасымыздың қолынан алған кездегі фотосуреті сақталған. Бұдан бөлек көрмеге батырдың жұмыс үстелі, жазу құралдары қойылған. Сондай-ақ Қасым Қайсеновке жерлестері тарту еткен граниттен жасалған қалам қойғыш та осында сақтаулы тұр, - деді облыстық этнографиялық музей директорының орынбасары Гүлжан Кашаку.