14:38, 25 Наурыз 2022 | GMT +6
ШҚО-да баласына алимент төлемей қойған 70-тен астам адам анықталды
ӨСКЕМЕН. ҚазАқпарат – Шығыс Қазақстан облысында биыл баласына алимент төлемеген 70-тен астам адам анықталды, деп хабарлайды ҚазАқпарат тілшісі.
ШҚО полиция департаменті баспасөз қызметінің мәліметіне сүйенсек, жыл басынан бері полиция қызметкерлері баласына алимент төлемеген 70-тен астам адамды анықтады.
«Мәселен, Шемонаиха аудандық полиция бөлімінің көші-қон қызметіне өзінің кәмелеттік жасқа толмаған баласына 700 000 теңгеден астам қарызы бар 31 жастағы ер адамды іздестіру туралы жеке сот орындаушысының қаулысы түсті. Іздестіру шаралары кезінде көші-қон қызметінің мамандары оның қайда екенін анықтады», - делінген ақпаратта.
Тұрақты жұмысы болмаған азамат екі жылдай уақыт баласына алимент төлемеген.
Алимент бойынша қарызды өндіріп алу үшін материал жеке сот орындуашысына берілді.