ШҚО-да аптаның соңына дейін көшкін жүру қаупі сақталады

ӨСКЕМЕН. ҚазАқпарат – Шығыс Қазақстан облысында осы аптаның соңына дейін көшкін жүру қаупі сақталады, деп хабарлайды ҚазАқпарат тілшісі.

ШҚО Төтенше жағдайлар департаменті баспасөз қызметінің мәліметіне сүйенсек, 13-19 сәуір аралығында өңірдің таулы аймақтарында көшкін жүруі мүмкін. Жыл сайын көктемнің алғашқы айларында қар көшкіні қаупі жоғары болады.

«Құбылмалы ауа райы мен қардың жылдам еруі – көшкін жүру мүмкіндігін арттыратын факторлар. Облыста көлік жолдары мен елді мекендерге көшкін қаупін төндіретін 336 учаске бар. Оларды «Қазселденқорғау« ШҚО филиалының мамандары ұдайы қадағалап отырады. Үнемі көшкін қаупі бар ошақтарға жер үсті және аэровизуалды мониторинг жүргізіліп, тауларда қардың жиналуы бақылануда. Сондай-ақ қажет болған жағдайда жасанды жолмен қар көшкіні түсіріледі», - деп хабарлады ведомство өкілдері.

Осы ретте департамент мамандары өңір жұртшылығына таулы аймақтарға бармай, көшкін қаупі бар учаскелерде серуендеуден аулақ болу қажеттігін ескертеді.