ШҚО-да 9,5 мыңға жуық бала келесі жылы бірінші сыныпқа барады
ШҚО білім басқармасы баспасөз қызметінің мәліметіне сүйенсек, бүгінгі таңда өңір бойынша 6 мың ата-ана баласын келесі оқу жылында бірінші сыныпқа қабылдауға өтініш білдірген.
Болжам бойынша Шығыс Қазақстан облысында барлығы 9,5 мыңға жуық бала мектеп табалдырығын алғаш рет аттайды деп күтілуде.
«Ата-аналарға құжаттарды өткізу үшін мектепке барудың қажеті жоқ. Өтініштер Egov электронды үкімет порталында қабылданады. Ата-аналарға оқу орнын таңдар кезде тезірек шешім қабылдауға кеңес береміз. Себебі қабылдау рәсімі 1 тамызға дейін ғана жүргізіледі. Яғни, ата-аналарға таңдау жасауға екі ай уақыт бар. Содан кейін оқулықтар санын қалыптастыру және мұғалімдерге сағаттық жүктемені бөлу жұмыстары басталады», - дейді басқарма басшысының орынбасары Динара Шаухина.
Оның айтуынша, облыс мектептеріне жаңа оқулықтар сатып алуға 450 млн теңге қарастырылған.