ШҚО-да 14 жыл бойы мемлекетаралық іздеуде жүрген қылмыскер ұсталды

НҰР-СҰЛТАН. ҚазАқпарат – Шығыс Қазақстан облысында құқық қорғаушылары 2005 жылдан бері мемлекетаралық іздеуде жүрген 43 жастағы қылмыскерді ұстады, деп хабарлайды ҚазАқпарат тілшісі облыстық полиция департаменттің баспасөз қызметіне сілтеме жасап.

«Жүргізілген кешенді жедел-іздестіру іс-шараларының нәтижесінде полицейлер іздеуде жүрген ер адамды Ресей Федерациясы Кемерово қаласынан ұстады. Оған аса ауыр қылмыс жасағаны үшін іздеу жарияланған болатын», - делінген хабарламада.

Тергеу нұсқасына сай, 1996 жылдың жазында күдікті бірнеше адамдардан құралған топпен сөз байласып, кісі өлтірген. Қылмыс барысында олар екі адамға пышақтап кеткен.

«Осы қылмыс 2004 жылы ашылып, аса ауыр қылмысты жасағандары үшін үш күдікті ер адам әртүрлі мерзімге бас бостандығынан айырылған. Сол уақытта қылмыстық істің төртінші фигуранты Қазақстан аумағынан бой тасалап кеткен. Ол он төрт жыл бойы көрші мемлекетте жасырынған. Қазір осы күдіктіні Қазақстанға экстрадициялау туралы мәселе шешілуде», - делінген хабарламада.