ШҚО-да 101 оқушы облыс әкімінің сыйлығын алды
ШҚО әкімі Даниал Ахметов олимпиадалардың, спорттық жарыстар мен шығармашылық байқаулардың жеңімпаздарын Халықаралық балаларды қорғау күнімен құттықтады.
«Тәуелсіздіктің 30 жылында еліміз талай белесті бағындырды. Әр мемлекеттің өзіндік өркендеу тарихы бар. Осы жылдар ішінде облыста 107 денсаулық сақтау нысаны, 144 мектеп, 500-ден астам спорт нысаны бой көтерді. Елбасымыз бәсекеге қабілетті мемлекет құру туралы әркез айтып келді. Ол үшін өскелең ұрпақ білімді болуы қажет», - деді аймақ басшысы.
«DREAMFEST» халықаралық бейнелеу және декоративті-қолданбалы өнер байқауының Гран-при иегері облыс әкіміне өз суретін сыйға тартты.
«Бала кезімнен сурет салғанды жақсы көремін. Суреттерім әу бастан үздік деп танылған жоқ. Бірақ мен сағым сынбай, әрдайым сурет салуды жалғастырдым. Мектепке түскен кезде мұғалімім мені сурет үйірмесіне жазды. Бұл шеберлік пен шығармашылықтың нағыз ортасы. Өз жұмыстарымды түрлі байқауларға жиі жіберіп тұрамын. Осы жылы туымдым Ресей, Польша, Түркия сияқты елдердің үміткерлері қатысқан «DREAMFEST» халықаралық байқауында Гран-приді жеңіп алды», - деді Семей қаласындағы №27 орта мектептің 9-сынып оқушысы Ғазиза Танабек.
Кездесу барысында барлық балаларға дипломдар мен ноутбуктар сыйға тартылды. Сонымен қатар мерекеге орай қала және аудан әкімдері 101 дарынды мектеп оқушысына облыс әкімінің атынан сертификаттар мен сыйлықтар табыс етті.